15-anyos stude dinukot, pinatay ng sundalo
MANILA, Philippines – Brutal na pinatay ang 15-anyos na estudyante matapos itong dukutin ng isang Army sergeant sa Tandag City, Surigao del Sur noong nakalipas na Linggo (Sept. 14).
Ayon kay P/Supt. Romaldo Bayting, spokesman ng Caraga PNP, natuldukan na rin ang misteryosong pagkawala ng biktimang si Annie Jane Cortes Broca ng Barangay Telaje sa nasabing lungsod.
Naagnas at halos kita na ang buto ng labi ng biktimang si Broca nang mahukay sa pinaglibingan sa dalampasigan ng Dumaran Beach sa Purok Dona Nicolas sa Barangay Magbanua noong Linggo ng hapon (Sept. 21)
?Positibo namang kinilala ni Arlene Broca ang naagnas at halos buto ng bangkay ng anak base sa suot nitong damit at iba pang kagamitan.
Kasunod nito, lumutang naman kamakalawa ang dalawang testigo na sina Josuel Rivera, dating boyfriend ng biktima at Alejean Pagaran, kaklase ni Broca kung saan itinuro ang suspek na si Sgt. Jeremy Calantina, 26, ng Army’s 36th Infantry Battalion ng Phil Army sa Tago, Surigao del Sur na sinasabing pangunahing suspek na nasa likod ng krimen.
Sa testimonya ng mga testigo, sinasabing si Sgt. Calantina ang sumundo kay Broca ng araw na mawala ito noong Setyembre 14 matapos na magpaalam ang biktima sa kaniyang ina na magsisimba sa nasabing lungsod.
Ini-report naman ng ginang sa pulisya ang pagkawala ng anak noong Setyembre 18, ilang araw matapos na mawala ang dalagita.
- Latest
