BULACAN, Philippines – Umaabot sa P.2 milyong halaga ng ari-arian ang tinangay ng mga di-kilalang lalaki matapos pasukin ng mga miyembro ng Akyat-Bahay Gang ang bahay ng batikang dzMM reporter kamakalawa ng hapon sa Barangay Pantoc, Meycauayan City, Bulacan.
Dumulog sa himpilan ng pulisya upang magreklamo ang biktimang si Doland Castro, newsman ng ABS-CBN dzMM, kasama ang misis nitong si Dra. Christina Jovida-Castro na mga residente ng La Brezza Subdivision sa nasabing barangay.
Sa imbestigasyon ni PO3 Francis Albert Reyes, lumilitaw na pansamantalang umalis ng bahay ang kasambahay ng mag-asawa para magpa-laundry ng mga damit.
Gayon pa man, ilang minuto ang nakalipas ay dumating naman si Doland sa kanilang bahay kung saan napansin nito na nakabukas ang kanilang gate.
Dito na kinutuban si Doland kaya mabilis na tinungo ang master’s bedroom kung saan bumulaga sa kanya ang nagkalat na mga kagamitan at nawawala ang 2-kahon ng alahas, dalawang lop top at isang Olympus Microscope.