Mag-asawa tinambangan sa Cotabato

MANILA, Philippines – Patay ang isang municipal education official at ang kanyang asawa matapos tambangan ng armadong kalalakihan kahapon sa Pikit, North Cotabato.

Kinilala ng hepe ng Pikit municipal police na si Inspector Mautin Pangandingan ang mga biktimang sina Violeta Almazan, 62, supervisor ng mga pampublikong paaralan sa bayan ng Midsayap sa North Cotabato, at mister na si Gervacio 63.

Patungo sana sa bayan ng Midsayap ang mag-asawa mula ng Arakan, North Cotabato nang pagbabarilin ng mga hindi pa nakikilalang suspek sa Barangay Dalengawen.

Kaagad nakatakas ang mga suspek na sakay ng motorsiklo.

Hindi pa malinaw kung ano ang motibo sa pananambang sa mag-asawa.