MANILA, Philippines - Tatlo-katao ang namatay habang tatlo naman ang grabeng nasugatan matapos magkarambola ang tatlong sasakyan sa tabi ng highway sa bayan ng Binmaley, Pangasinan noong Miyerkules ng hapon.
Ayon sa ulat na nakarating kay P/Supt. Ferdinand de Asis, hepe ng Binmaley PNP, kabilang sa namatay ay sina Dory de Leon na nahati ang katawan at Galileo Caladiao, 47, driver ng motorsiklo na pumailalim sa truck.
Samantalang inararo pa ng truck ang bahay sa tabi ng highway kung saan namatay si Victoria Cortez na nagluluto ng pagkain para sa kanilang karinderya.
Sa inisyal na pagsisiyasat, nag-overtake ang truck (XSH-549) ni Gilbert Catalan sa motorsiklo ni Caladiao.
Gayon pa man, nakabanggaan naman nito ang dump truck (SKH -741) ni Jaime de Guzman kung saan nahagip ang motorsiklo ni Caladiao na kaangkas ang ka-live-in nitong si de Leon na pumailalim sa dump truck at nakaladkad.
Samantala, naisugod naman sa pagamutan ang nasugatang driver ng truck at pahinante nitong si Ronnie Mararac.
Sa nasabing insidente ay halos nadurog ang mukha ni de Leon at nahati ang katawan kung saan nahirapan ang rescue team na alisin ang katawan ng magka-live-in sa ilalim ng dump truck.