BATANGAS, Philippines - — Pinabulagta ang 57-anyos na negosyanteng may-ari ng quarrying matapos tambangan ng riding-in-tandem gunmen sa bayan ng Rosario, Batangas kahapon ng hapon
Kinilala ang biktimang si Isidro Ancheta ng Barangay Sto. Niño, bayan ng Taysan, Batangas at dating pulis na may ranggong SPO4 na naka-assign sa Rosario PNP.
Nabatid na nagretiro si Ancheta sa pagkapulis nang makapagnegosyo ng quarrying sa bayan ng Taysan.
Ayon sa police report, nakaparada sa harap ng Rosario public market si Ancheta sakay ng Toyota Fortuner nang lapitan at ratratin ng dalawang di-kilalang lalaki na sakay ng motorsiklo. Naisugod pa sa Maderazo Hospital si Ancheta pero namatay din habang ginagamot dahil sa mga tinamong mga tama ng bala ng baril.
Inaalam pa ng mga otoridad ang motibo sa pamamaslang habang patuloy ang hot pursuit operation laban sa gunmen.