Dalagita naisalba sa 4 adik

LEGAZPI CITY, Albay, Philippines – Nailigtas sa tiyak na kapahamakan ang 16-anyos na dalagita sa kamay ng apat na adik sa bawal na droga sa isinagawang operasyon ng pulisya sa isang hotel sa Micericordia Street, Barangay Tinago sa Naga City, Camarines Sur, ayon sa ulat kahapon. Itinago sa pa­ngalang Sherrybel ang biktima habang nasakote naman ang mga suspek na sina Jhon Josua Abad, 22; Jarid Ortua, 21; Jun - Jun Lopez, 19; at si Phil Alfred Atos, 21, pawang nakatira sa iba’t ibang barangay sa nasabing lungsod. Sa tulong ng ina ng dalagita ay sinalakay ng pulisya ang Room 203 ng Golden Leaf Hotel kung saan naaktuhan sa pot session ang mga suspek at ang biktima na lango na sa droga. Nasamsam sa mga suspek ang ilang plastic sachet ng shabu, cell phone, digital weighing scale at ilang paraphernalia na gamit sa droga. Pinaniniwalaan ng pulisya na pipilahan ng mga suspek ang biktima kapag lango na sa bawal na droga.