Sekyu utas sa paglalaro ng boga

MANILA, Philippines – Natalo kay kamatayan ang isang security guard matapos aksidenteng mabaril ang sarili habang nilalaro ang kanyang shotgun kagabi sa Pagadian City, Zamboanga del Sur.

Nakilala ang biktimang si Roy Mangharal, 28, na nagtatrabaho para sa Tabunaway Warrior Security Agency at nakatalaga sa Camella Homes sa Barangay Tiguma, Pagadian City.

Sinabi ng tagapagsalita ng Police Regional Office 9 na si Senior Inspector Joseph Ortega, nakita ng isa pang security guard si Mangharal na nilalaro ang 12-gauge shotgun at itinutok sa ulo.

Napindot umano ng biktima ang gatilyo ng baril dahilan upang sumabog ang ulo nito at mamatay.

Narekober ng mga pulis ang shotgun na kargado pa ng limang bala.

Nakuha din ng mga awtoridad ang isang basyo ng bala at pito pang bala sa bulsa ng biktima.

Hindi pa rin iniisantabi ng mga pulis na baka may foul play sa insidente.