TUGUEGARAO CITY, Cagayan , Philippines – Masaklap na kamatayan ang sinapit ng 65-anyos na lolo na nagja-jogging matapos itong tamaan ng gulong na tumalsik mula sa aircon bus sa kahabaan ng highway sa Barangay Magsaysay, bayan ng Naguillian, Isabela kahapon. Hindi na umabot ng buhay sa ospital ang biktimang si Rico Tabije habang inaresto naman ang driver ng Everlasting Bus (UVL 787) na si Joey Gonzales, 45, ng Calamba City, Laguna. 
Sa imbestigasyon ng pulisya, natanggal ang isa sa dalawang gulong sa kaliwang likuran ng bus na sinasabing maluwag ang pagkakaturnilyo kaya kumalas at gumulong sa gilid ng kalsada.
 Tinamaan naman ang biktima na inaalagaan ang kanyang kalusugan sa pagja-jogging upang humaba pa ang buhay.