Tsino, 2 pa dakma sa shabu lab

LEGAZPI CITY, Albay, Philippines – Kalaboso ang tatlong sibilyan kabilang na ang isang Tsino makaraang masakote ng mga awtoridad sa itinayong shabu laboratory sa Barangay Tinago, bayan ng Aroroy, Masbate kamakalawa. Pormal na kinasuhan ang mga suspek na sina William Ong, 51, Tsino;Tony Locsin, 67; at si Benjamin Llaguna, 65, pawang nakatira sa nabanggit na barangay. Ayon kay P/Chief Supt. Victor P. Deona, ang pag-aresto sa mga suspek ay base sa search warrant na inisyu ni Judge Manuel L. Sese ng Masbate City Regional Trial Court Branch 45. Sa ulat ng pulisya, lumilitaw na ginawang front ng mga suspek ang kompanya at bodega ng minahan para hindi mahalata ang shabu lab subalit nadiskubre rin ng mga awtoridad. Nasamsam sa mga suspek ang 95 iba’t ibang uri ng kemikal, mga gamit sa paggawa ng shabu at iba pang paraphernalia.