TUGUEGARAO CITY, Cagayan, Philippines - – Napariwara ang kinabukasan ng 14-anyos na dalagita makaraang pilahan ng magkaibigang lalaki habang nakikipag-inuman kamakalawa ng hapon sa Mt. Mantuol, Barangay Murong, bayan ng Bagabag, Nueva Vizcaya. 
Itinago sa pangalang Remedios ang biktima habang arestado naman ang dalawang suspek na sina John Efraim Alava, 23; at Bilal John Khan, 20, kapwa nakatira sa Barangay Sta. Cruz sa nasabing bayan.
 Ayon kay PO1 Jovelyn Taguinod ng Women’s and Children’s desk ng Bagabag PNP, inanyayahan ang biktima ng kaibigan nitong dalagita kasama ang nobyo at ang dalawang suspek. Kinahapunan ay nalango ang biktima kaya isinagawa ang maitim na balak ng dalawa habang nagkubli naman sa ibang lugar ang magnobyo.
 Nakatakas naman ang biktima kung saan naipaabot ang reklamo sa pulisya.