P4M smuggled na bigas naharang sa Zambo

MANILA, Philippines – Umabot sa 4,000 sako ng smuggled na bigas ang naharang ng mga awtoridad sa isang pribadong daungan ng banka sa Zamboanga City.

Nakumpiska ng Zamboanga City Public Safety Company (ZCPSC) ang mga bigas mula sa M/L Princess Sibutu na mula ng Tawi-Tawi.

May tatak na “AAA” ang mga 4,000 sako ng bigas na tig-25 kilo na napag-alamanang pinadala ng isang Alnezar Usman.

Walang naipakitang kaukulang papeles si Usman kaya naman kinumpiska ang mga bigas na aabot sa P4 milyon ang halaga.

Wala rin naipakitang manifesto ng kargamento ang may-ari ng bangkang de motor na si Jul-Arab Akan ng Bongao sa Tawi-Tawi.

Nasa kustodiya na ng Bureau of Customs ang mga nasabat na bigas.