2 barangay kagawad nilikida

LEGAZPI CITY, Albay, Philippines - - Dalawang barangay kagawad na inakusahang mga tiktik ng militar ang napaslang makaraang pagbabarilin ng mga rebeldeng New People’s Army  sa tupadahan sa Barangay Quibonggongan, bayan ng Guinobatan, Albay kamakalawa ng hapon. Kinilala ang dalawa na sina Kagawad Naron Ingguwa ng Barangay Bariw, Camalig, Albay at Kagawad Abelardo Convocar ng Barangay Quitago sa bayan ng Guinobatan, Albay. Sa ulat na natanggap ni P/Senior Supt. Marlo Meneses, Albay PNP director, naganap ang pamamaril habang ang dalawang opisyal ng barangay ay nasa loob ng tupadahan. Napag-alamang natiyempuhan ang dalawa sa tupada na sinasabing may dalawang linggo nang operasyon kung saan dinarayo ng mga mananabong.