MANILA, Philippines - Tatlumput-isang miyembro ng PNP-Special Action Force (PNP-SAF) ang nasugatan makaraang bumaliktad ang sinasakyang truck sa kahabaan ng national highway sa Poblacion, bayan ng Kiamba, Saranggani kahapon ng madaling araw.
Ayon kay P/Supt. Jomar Alexis Yap, deputy director ng Sarangani PNP Office, bandang alas-2:50 ng madaling araw habang lulan ng puting Mitsubishi Elf truck (SFV 497) ang 36 SAF personnel ng maganap ang sakuna.
Ang truck na minamaneho ni PO3 Clemente Daligdig na patungong Palimbang nang maaksidente ito habang bumabagtas sa pakurbadang daan.
Nabatid na nawalan ng kontrol sa manibela ang driver ng truck na nagpagiwang-giwang hanggang sa tuluyang bumaliktad.
Sa 16 na nasugatan ay isinugod sa Kiamba Hospital, 12 naman sa Mindanao Medical Center at tatlo sa Tiburcio Hospital na pawang sa Sarangani at General Santos City.
Samantala, hindi nasugatan ang lima sa mga elite forces ng PNP.