TUGUEGARAO CITY, Philippines- Sinisiyasat ngayon ng pulisya ang kaso ng isang 44 anyos na detainee sa Cauayan City Jail na namatay sa Isabela Provincial Hospital matapos matuklasang kumain ng tinapay na may palamang lason sa daga nitong nakaraang linggo.
 Kinilala ni Rosita Andaya ang bangkay ng kanyang anak na si Cesar Andaya alyas Raffy ng Brgy. Magsaysay, Naguilian, Isabela matapos itong tawagan ng pagamutan noong Biyernes kaugnay sa kamatayan ng nahuli. 
Ang nakababatang Andaya ay humaharap sa kasong panggagahasa ay pinaniniwalaang sadyang nilason sa loob ng bilangguan.
 Ayon kay Dr. Donna Marie Dequito na sumuri sa bangkay ng biktima, isang uri ng lason sa daga ang nakain ng nahuli na nagdulot ng pananakit ng tiyan, pagkahilo at pagsusuka bago ito isinugod sa pagamutan sa kabisera ng Ilagan City kung saan ito namatay.