2 students utas sa road mishap

CABANATUAN CITY, Nueva Ecija, Philippines - – Dalawang estudyante sa kolehiyo ang namatay habang dalawang iba pa ang nasugatan makaraang bumangga ang sinasakyan ng mga itong motorsiklo sa puno ng Acacia sa Brgy. Sta. Arcadia ng lungsod na ito, kamakalawa ng madaling araw.

Kinilala ni P/Supt. Pedro Soliba, hepe ng pulisya rito, ang dalawang biktima na sina Erick Marck Ponce, 20-anyos, binata ng Champaca 1, Brgy. Dicarma, ng lungsod na ito; at si Realyn Bugarin, 18, dalaga ng Brgy. Sta. Arcadia; pawang ng lungsod na ito.

Kasalukuyan namang nilalapatan ng lunas sa Dr. Paulino  Garcia Hospital dito, ang sugatang biktima na sina Kay Ann Almeda, 16 anyos at  Aileen Bernardo, 18 taong gulang.

Ayon sa ulat, isa-isang inihahatid ni Ponce sa kani-kanilang mga bahay ang tatlong babaeng sakay nito sa  kulay pulang Yamaha Mio motorcycle (9321-N), nang mangyari ang aksidente, bandang ala-1:10 ng madaling-araw.

Sa lakas ng pagkakabangga, ang apat na sakay ng motorsiklo ay nagtamo ng matitinding pinsala sa katawan na humantong sa pagkamatay ng driver na si Ponce at ni Bugarin na hindi na umabot pa ng buhay sa nabanggit na ospital. Iniimbestigahan pa ang kasong ito.