Nursing student binoga sa ulo, dedo
BATANGAS, Philippines - – Sinalubong ni kamatayan ang 33-anyos na nursing student matapos pagbabarilin ng ‘di-kilalang lalaki sa bahagi ng Barangay Tambo sa Lipa City, Batangas kahapon ng umaga.
Dalawang tama ng bala sa ulo ang tumapos sa buhay ni Pamela Alcantara Tablizo ng Vista Verde, Cainta, Rizal at nursing student sa Lipa City Colleges.
Sa ulat ni P/Supt. Jacinto Malinao, hepe ng Lipa City PNP, patungong eskuwelahan si Tablizo sakay ng pampasaherong jeepney nang lapitan at ratratin ng armadong lalaki bandang alas-8:15 ng umaga.
Si Tablizo na nakaupo sa harapang bahagi ng jeepney ay duguang bumulagta matapos mapuruhan ng dalawang bala sa ulo.
Isinugod pa sa Mary Mediatrix Hospital pero idineklarang patay ng mga doktor sa emergency room.
Sa nakalap na impormasÂyon ng Lipa PNP, si Tablizo ay may dalawang anak na nasa bayan ng Cainta, Rizal habang nasa NewYork City, USA naman ang asawa nito.
Umuupa ng apartment si Tablizo sa Baseview Homes sa Barangay Banay-Banay, Lipa City habang nag-aaral.
Samantala, wala pang malinaw na motibo sa naganap na pamamaslang habang sinusuri naman ang mga text messages na nakuha sa cell phone ng biktima.
- Latest
