CAMP SIMEON OLA, Legazpi City, Philippines - — Dead-on-the- spot ang isang mister matapos na pagbabarilin ng mga suspek habang ito ay nasa loob ng sabungan kahapon ng madaling-araw sa Sitio Panorama, Brgy. Poblacion, Cawayan, Masbate.
Nakilala ang nasawi na si Danilo Dilao, 41, residente ng Brgy. Itombato ng naturang bayan.
Sa ulat ng pulisya ang pamamaslang ay naganap dakong alas-3:20 ng madaling-araw habang ang biktima ay nasa loob ng sabungan dahil sa pa-derby ng barangay sa nalalapit nilang kapistahan nang lapitan at bigla na lamang pagbabarilin ng mga suspect.
Matapos ang ginawang pamamaril ay mabilis naman na naglakad lamang papalayo sa lugar ang mga salarin at iniwang nakabulagta sa upuan ang biktima.
Hindi pa mabatid ng mga awtoridad kung ano ang motibo sa pagpaslang sa biktima habang isinasagawa pa ang masusing imbestigasyon ukol dito.