CAMP SIMEON OLA , Legazpi City, Philippines – Hindi na umabot ng buhay sa pagamutan ang isang magkapatid matapos na pagbabarilin ng kanilang mga nakaaway sa Brgy. Quinale, Calabanga, Camarines Sur kamakalawa.
Kinilala ang mga biktima na sina Francisco Sta. Ana, 26, at Jojo Sta. Ana, 24; pawang idineklarang dead-on-arrival sa Bicol Medical Center.
Pinaghahanap naman ng mga awtoridad ang mga suspek na sina Edmundo Tadeo, 47, may-asawa, magsasaka at Jose Tadeo, 45; mga taga Brgy. Harubay ng bayang ito.
Batay sa ulat ng pulisya, naganap dakong alas-6 ng gabi kasalukuyang nakaupo at nagkukuwentuhan sa labas ng kanilang tahanan ang mga biktima sa lugar nang biglang dumating ang mga suspek at pagbabarilin ang mga ito.
Isinasailalim pa sa imbestigasyon ang motibo ng krimen.