NORTH COTABATO , Philippines - Kulungan ang binagsakan ng isang bike rider makaraang arestuhin ng mga awtoridad dahil sa pagdadala ng bomba na isinilid sa bunga ng durian sa bayan ng Midsayap, North Cotabato kamakalawa ng umaga. Kinilala ni P/Supt. Reinante Delos Santos, hepe ng Midsayap PNP ang suspek na si Abdul Abas ng Barangay Tugal sa nasabing bayan.
Ayon sa ulat, nakatanggap ng impormasyon ang pulisya na tangkang magpasabog ng bomba kaya inilatag ang checkpoint sa Barangay Poblacion 8 kung saan namataan naman ang suspek na lulan ng motorsiklo.
Gayon pa man, tinangkang harangin ng tropa ng 40th Infantry Battalion ng Phil. Army at pulisya ang suspek subalit tumakbo ito at iniwan ang kanyang motorsiklo sa gilid ng kalsada kung saan naaresto naman ito.
Nang suriin ng mga tauhan ng 66th Explosive Ordnance Disposal Team ng Philippine Army ang motorsiklo ng suspek ay nadiskubre ang dalawang bunga ng durian kung saan isa rito ay naglalaman ng improvised explosive device (IED) na gawa sa bala ng 60mm mortar, 9-volts battery at cell phone bilang triggering mechanism.