MANILA, Philippines - Dahilan sa larong basketball, nasa malubhang kalagayan ngayon ang isang high school student matapos itong saksakin ng kapwa estudyante sa gitna ng mainitang pagtatalo sa General Santos City kamakalawa.
Kinilala ang biktima na si Jimboy Sandag, 20, estudyante sa New Society National High School sa lungsod na patuloy na nilalapatan ng lunas sa pagamutan.
Sumuko naman sa pulisya ang suspek na si Melvin John Barreta, 18-anyos, matapos ang insidente.
Sa inisyal na ulat ng General Santos City Police, naganap ang insidente bandang alas-4 ng hapon habang naglalaro ng basketball ang mga biktima na nagpupustahan sa maisho-shoot na bola sa ring.
Base sa imbestigasyon, nagkainitan ang dalawang estudyante matapos na makapuntos ng mas marami ang huli kumpara sa suspek kaya’t sinaksak ng kutsilyo ang biktima.
Kasalukuyan na ngayong nakapiit sa detention cell ng General Santos City Police ang suspek na nahaharap sa kasong kriminal.