TUGUEGARAO CITY, Cagayan, Philippines - Pinabulagta ang 28-anyos na negosyanteng pamangkin ng dating vice mayor matapos itong pagbabarilin ng di-kilalang lalaki sa harapan ng tindahan sa Barangay Mabini, bayan ng Gamu, Isabela kahapon ng tanghali.
Kinilala ni P/Senior Insp. Calixto Labang ang biktima na si Onofre Lacerna Jr. na napuruhan sa ulo ng bala ng cal. 45 pistol.
Ayon kay Labang, si Lacerna ay pamangkin ni dating Vice Mayor Nestor Lacerna na ngayon ay administrador ni Mayor Nestor Uy sa nasabing bayan.
Lumalabas sa imbestigasyon na ipinaparada ng biktima ang pag-aaring traysikel sa likuran ng kanyang tindahan nang lapitan at ratratin ng gunman.
Nagawa pang isugod sa Isabela Doctors’ Hospital sa Ilagan City subalit idineklarang patay ang biktima.
Nabatid kay Labang na isa sa mga anggulong sinisilip ay ang pagkakasangkot ng biktima sa kasong homicide na dinidinig kahapon sa Iligan City Regional Trial Court ng Ilagan City.