BULACAN , Philippines - Dalawang kalalakihan na pinaniniwalaang biktima ng summary execution ang itinapon sa magkahiwalay na lugar sa lalawigan ng Bulacan kahapon. Unang natagpuan ang katawan ng isang lalaki sa madamong bahagi ng Pecsonville, Barangay Tungkong Mangga sa San Jose del Monte City. Samantala, natagpuan naman ang isa pang lalaking sinalvage sa hangganan ng Brgy. Liciada-Talampas road sa bayan ng Bustos, Bulacan. May palatandaang pinahirapan muna ang mga biktima bago binaril at iginapos saka inabandona sa nasabing lugar. Pinaniniwalaang pinatay ang dalawa sa ibang lugar saka itinapon sa nasabing barangay para iligaw ang mga imbestigador ng pulisya.