MANILA, Philippines - Pinaniniwalaang alitan sa lupaing minana sa kanilang mga magulang ang isa sa motibo kaya binaril at napatay ang 33-anyos na lalaki ng sariling kapatid na magsasaka sa Barangay Madduang, bayan ng Kabuga, Apayao kamakalawa. Napuruhan sa mukha ang biktimang si Donald Balatoc habang tinutugis naman ng pulisya ang suspek na si Nolie Balatoc, 44, kapwa nakatira sa nabanggit na barangay. Sa ulat ni P/Supt. Davy Vincent Limmong na nakarating sa Camp Crame Police, katatapos lamang magpiknik sa Madduang River ng pamilya Balatoc at papauwi na sana nang barilin ang biktima ng kanyang kapatid na nakatatanda. Sa impormasyong nakalap ng pulisya, lumilitaw na may kinikimkim na galit ang suspek sa biktima dahil sa malaking bahagi ng kanilang lupaing sakahan ay ipinamana ng kanilang mga magulang.