MANILA, Philippines - Isang pinaghihinalaang notoryus na shoplifter ang nasawi makaraang bigla itong atakehin ng sakit na epilepsy nang manlaban sa umaarestong mga miyembro ng customer intelligence (CI) ng Gaisano Metro Mall sa Cebu City nitong Biyernes ng gabi. Kinilala ang nasawi na si Mario Alfie Ducay, nasa hustong gulang na idineklarang dead-on-arrival sa pagamutan. Sa imbestigasyon, sinabi ni Inspector Manuel Cañete, Chief ng Homicide Division ng Cebu City Police, bandang alas-6:30 ng gabi ng mahuli umano ng mga CI ang suspek na walang resibo ang mga pinamili nitong groceries habang naglalakad sa ikalawang palapag ng mall. Ayon kay Cañete habang inaaresto ay nagpumiglas ang suspek at bigla na lamang itong natumba saka bumula ang bibig na pinaniniwalaang sinumpong ng sakit na epilepsy. Sa tala ng pulisya, may rekord ng shoplifting ang suspek na isinailalim na sa awtopsya ang bangkay.