1 patay, 3 sugatan sa killer truck

MANILA, Philippines - Isa ang iniulat na nasawi habang tatlong iba pa ang nasugatan makaraang salpukin ng truck ang dalawang sasakyan sa Sitio Cabading, Barangay San Jose, Antipolo City, Rizal kahapon ng umaga. Kinilala ang nasawi na si Jerome Bandoja Rocello, 30, ng Sta. Mesa, Maynila habang sugatan naman ang driver ng trak na si Edwin Baluyot, 36 at ang magpinsang pahinante na sina Michael Henson, 31; at Jonathan Henson, 25, na naisugod sa Amang Rodriguez Hospital.  Ayon kay PO3 Renato Abalos ng Antipolo City PNP, nawalan ng preno ang trak na kargado ng buhangin kaya inararo ang mga nakaparadang taxi ni Mark Neil Sanchez at motorsiklo ni Rocello na naipit sa ilalim ng trak. Nabatid na ang trak ay patungong Maynila mula sa bayan ng Infanta, Quezon nang maganap ang trahedya sa kahabaan ng Marcos Highway.