LUCENA CITY, Quezon, Philippines - Nagmistulang ninja sa pelikula ang isang obrero nang patayin sa taga sa pamamagitan ng samurai ang kanyang kapitbahay sa Purok Masagana, Barangay Ransohan sa Lucena City, Quezon kamakalawa ng gabi. Agad na namatay ang biktimang si Domingo Alvarez habang tugis na ng pulisya ang suspek na si Dominador Portes. Ayon kay PO3 Jeff Tamaray, dakong alas-7 ng gabi nang kumprontahin ng suspek ang biktima hinggil sa matagal na nilang alitan. Hindi umano pinatulan ng biktima ang suspek hanggang sa umuwi sa kanilang bahay ang suspek at pagbalik ay armado na ito ng samurai. Pagkakita sa biktima ay nagmistulang ninja ang suspek na pinagtataga ang biktima sa hita, katawan, leeg, at mukha saka mabilis na tumakas.