SANTIAGO CITY, Isabela, Philippines – Naputol ang kanang kamay ng 61-anyos na batikang mangingisda matapos masabugan ng dinamita habang nangingisda sa karagatan ng bayan ng Burgos, Ilocos Norte kahapon ng umaga. Nakilala ang mangingisda na si Roberto Bucao ng Barangay Bubon, Burgos, Ilocos Norte. Sa ulat ng pulisya, dakong alas 7 ng umaga nang pumalaot si Bucao para mangisda, subalit nagulat na lamang ang kapwa mangingisda nang makarinig ng malakas na pagsabog sa kinaroroonan ng biktima. Agad na nilapitan ng ibang mangingisda ang bangka ni Bucao kung saan nakita ang sugatang mangingisda na wala ng kanang kamay at may mga sugat sa ibat-ibang bahagi ng katawan. Napag-alamang sumabog ang dinamita na pinaniniwalaang gagamitin sana ni Bucao sa pangingisda.