MANILA, Philippines - Dahil sa pagtatanggol sa anak na babae mula sa pambubugbog ng sadista nitong mister, bagsak kalaboso ang 54-anyos na ama na sinaksak ang abusadong lalaki sa Purok 10, Barangay Fort Poyohon, Butuan City sa Agusan del Norte kamakaÂlawa ng umaga.
Samantala, sumuko sa pulisya ang suspek na si Ereneo Desamparado bitbit ang patalim na ginamit sa pananaksak habang naisugod naman sa provincial hospital ang biktimang si Jones Granada sa tinamong sugat sa tiyan.
Lumilitaw na sumaklolo ang suspek matapos na mabatid ang pagmamalupit ni Jones sa kaniyang anak na si Rowena.
Hindi inabutan ng matandang Desamparado ang anak na si Rowena sa bahay dahil humingi ito ng tulong sa barangay hall matapos na tutukan ng baril at bugbugin ni Jones dahil sa matinding selos.
Nagkataon namang umuÂwi ng kanilang bahay si Jones kung saan inabutan nito ang naghihintay na biyenan at nagkaroon ng mainitang pagtatalo.
Sa matinding silakbo ng galit ay inundayan ng saksak ng matandang Desamparado ang sadistang manugang na bagaman nasugatan sa tiyan ay nagawang makatakbo at makahingi ng tulong sa mga kapitbahay.