MANILA, Philippines - Dinukot ng dalawang hindi pa nakilalang mga armadong kalalakihan ang isang taong gulang na anak ng isang sundalo na miyembro ng Philippine Navy matapos na pasukin ang tahanan nito sa bayan ng Patikul, Sulu kamakalawa. Sa ulat ng Sulu Police, kinilala ang biktima na si Yul Vincent Akla, anak ng mag-asawang sina Pfc Vic Akla, aktibong kasapi ng Philippine Navy at misis nitong si Jane Akla. Ang Sulu ay isa sa mga balwarteng lugar ng mga bandidong Abu Sayyaf Group na notoryus sa mga kaso ng kidnapping-for-ransom kung saan inaalam pa ng mga awtoridad kung may kinalaman ang mga ito sa insidente. Base sa imbestigasyon, naganap ang insidente sa tahanan ng pamilya Akla na matatagpuan sa Christian Village, Gandasul, Patikul ng lalawigang ito bandang alas-10:45 ng umaga. Bigla na lamang umanong sumulpot sa lugar ang mga armadong kidnappers na pinasok ang tahanan nina Akla saka tinutukan ng baril ang mga inabutang tao dito kung saan nagkataong wala ang padre de pamilya nang mangyari ang kidnapping. Nagsasagawa na ng followup operation ang mga awtoridad sa kasong ito.