BOCAUE, Bulacan , Philippines – Napaaga ang salubong ni kamatayan sa isang 34 anyos na negosyante makaraang tambangan ito ng dalawang lalaking magkaangkas sa motorsiklo sa kahabaan ng highway sa bayang ito kahapon ng umaga.
Idineklarang dead-on-arrival sa St Paul Hospital ang biktimang kinilalang si Leo Luwalhati, residente ng Brgy. Bunducan sa bayang ito habang tumakas agad ang mga suspek na kinilala sina Ruperto “Boy Linda” Victoria at isang alyas Boy Hapon na residente rin sa naturang lugar.
Base sa imbestigasyon ni P02 Ricky Baluyot, dakong alas-10:30 ng umaga ay umalis ang biktima mula sa kanyang bahay na lulan ng pag-aaring Honda CRV (WRX - 377) patungo sa hindi nabatid na destinasyon at ilang metro pa lamang nakalalayo sa kaniyang tahanan ay hinarang ng mga suspek.
Nang huminto ang biktima at inaakalang kakausapin lamang siya ng mga suspek ay agad na binunot ni Victoria ang isang .45 kalibre ng baril saka pinaputukan ng pitong beses ang biktima na duguang bumulagta sa insidente.
Samantalang parang walang anuman na naglakad lamang ang mga suspek sa madamong bahagi ng lugar bitbit ang armas na ginamit sa krimen. Isinasailalim pa sa masusing imbestigasyon ang kasong ito.