MANILA, Philippines - Binaril nang malapitan at napaslang ang isang brgy. chairman ng nag-iisang armadong salarin habang nasa peryahan sa bisperas ng Pasko sa Brgy. Poblacion, Mangatarem, Pangasinan kamakalawa ng gabi.
Kinilala ang nasawing biktima na si Ricardo Lopez, brgy. chairman sa Poblacion ng bayang ito.
Naganap ang insidente bandang alas-7:30 ng gabi habang nasa peryahan ang biktima nang lapitan ng armadong lalaki at walang sabi-sabi itong pinagbabaril. Nagawa pang maisugod ang biktima sa pagamutan pero nabigong maisalba ang buhay.
Mabilis namang tumakas ang suspek na humalo sa nagkakagulong mga tao sa plaza kaya nabigo ang mga operatiba na maaresto ito.
Narekober naman ng mga awtoridad sa crime scene ang anim na basyo ng bala ng cal. 45 pistol at patuloy rin ang imbestigasyon sa motibo ng krimen.