Kandidatong konsehal todas sa ambush

MANILA, Philippines - Camp Simeon Ola, Legaspi City, Philippines – Pinagbabaril at napatay ang isang retiradong opisyal ng pulisya na kasalukuyang kandidatong municipal councilor matapos na tambangan ng hindi pa nakilalang mga armadong salarin na hinihinalang ‘hired killers’ sa kahabaan ng highway ng Brgy. Tonga, Balud, Masbate kamakalawa.

Dead-on-the-spot sa tinamong mga tama ng bala sa iba’t ibang bahagi ng katawan ang biktimang kinilalang si ret. Chief Inspector Vicente Aragona, nasa hustong gulang, residente ng nasabing lugar.

Ayon kay Police Regional Office (PRO) V Spokesman Supt. Renato Bataller, naganap ang krimen sa nasabing lugar dakong ala-1:30 ng hapon habang ang biktima ay lulan ng motorsiklo pauwi sa kanilang tahanan.

Ang biktima ay galing sa Brgy. Pajo at patungo sa Poblacion ng bayang ito nang harangin at pagbabarilin ng mga armadong suspek.

Nagtamo ang biktima ng mga tama ng bala sa ulo at katawan na tumilapon sa sinasakyang motorsiklo at duguang bumulagta sa kalsada kung saan mabilis namang nagsitakas ang mga salarin patungo sa hindi pa malamang destinasyon.

Narekober naman ng mga nagrespondeng awtoridad ang mga basyo ng bala ng cal 9mm na siyang ginamit ng mga suspek sa pamamaslang sa biktima.

Pinaniniwalaan namang  pulitika ang motibo ng krimen kaugnay ng mid term election sa Mayo 2013.