Rice trader itinumba ng tandem

TUGUEGARAO CITY, Philippines - Muli na naman naghasik ng lagim ang riding-in-tandem matapos ratratin at mapatay ang 52-anyos na rice trader sa Barangay San Sebastian sa bayan ng Ramon, Isabela kamakalawa.

Base sa police report, nasa loob ng bahay ang biktimang si Leonardo Pantaleon nang pasukin at pagbabarilin ng dalawang armadong lalaki.

Kahit sugatan ay tinangkang lumabas ng biktima subalit hinabol pa ito ng gunmen saka muling pinutukan ng baril. Kaswal lamang na naglakad ang gunmen palabas ng bahay saka tumakas na lulan ng motorsiklo.

Sa tala ng pulisya, noong nakalipas na linggo lamang, dalawang negos­yanteng mula Lipa City, Batangas ang niratrat at napatay ng tandem assassins sa Barangay Raniag.

Kasunod nito, nanawagan naman si P/Chief Supt. Rodrigo de Gracia sa mga opisyal ng lokal na pamahalaan na madaliing aprubahan ang ordinansa  kaugnay sa rehistrasyon ng mga motorsiklo sa region 2 sa ilalim ng panukala ng pulisya sa Verification Identification Sticker Authenticity (VISA).