Tren sinuwag ng tanker truck, nadiskaril

NABUA, Camarines Sur, Philippines — Nadiskaril ang bagon ng tren ng Philippine National Railways (PNR) matapos banggain ng isang oil tanker truck habang tumatawid sa railroad crossing ng Maharlika National Highway sa Brgy.Paloyon Proper, Nabua, Camarines Sur kahapon ng madaling araw.

Isinugod sa Bicol Medical Center sa Naga City ang sugatang driver ng flammable tanker truck (CBQ-3688) na kinilalang si Jeric Guiriba, 41-anyos, ng Manresa, Quezon City. 

Sa ulat, dakong alas-2:50 ng madaling araw maayos na bumabagtas ang commuter train na may body number na 2520-PNR na pinatatakbo ni Cesar Cariño, 55-anyos, galing ng Naga City patungong bayan ng Polangui sa Albay nang habang tumatawid sa railroad crossing nang biglang salpukin ng rumaragasang oil tanker truck.

Sa lakas ng pagkakabangga, umangat ang bagon ng tren at nadiskaril ang tren sa rail rack nito.

Parehong nagtamo ng malaking pinsala ang trak at tren habang sugatan ang driver ng una na mabilis isinugod sa pagamutan.

Bahagya namang nagkaroon ng bigat sa daloy ng trapiko sa lugar makaraan ang aksidente na agad namang naayos ng rumespondeng mga pulis. 

Humingi ng paumanhin ang PNR Magament sa nangyaring aksidente habang nanawagan sa publiko na mag-ingat sa pagtawid at sundin lagi ang “safety principle” ng stop, look and listen.