Personal o gisugo

Gidakop sa mga sakop sa National Bureau of Investigation sa gipahigayon nila nga entrapment operation ang hepe sa Fire Safety Enforcement Section sa Cebu City Fire Department nga si Fire Inspector Mat Roy Castro tungod sa kasong pagpangilkil ngadto sa usa ka aplikante sa pagka bombero.

Gihulipan dayon sa iyang katungdanan si Castro niadtong miaging Biyernes human siya mabalhog sa prisohan sa NBI.

Gipasanginlan si Castro sa usa ka aplikante sa pagka bombero nga nangayo kaniya og P400 mil aron makasulod sa pagka bombero.

Giingon nga gihimo ni Castro ang pagpangayo sa nahisgotan nga kantidad tungod kay gisugo kini sa iyang labaw sa pagtigom og salapi para ipabawon sa ilang opisyal sa kabomberohan nga moretiro na sa katungdanan.

Kun ugaling tinuod man nga nahimo ni Castro ang pagpangilkil sa aplikante kay gisugo siya sa iyang labaw sa pagtigom og salapi nga ipabawon sa ilang opisyal nga moretiro, mas maayo Seguro nga iyang itug-an ang pangalan sa iyang labaw nga nagsugo kaniya, dili kay iya lang sulohon ang salaud. Puslan man, mas mayo pay mangdamay.

Pero kun iya lamang personal nga hukom ang pagpangilkil sa salapi nga ngadto sa usa ka aplikante, mas maayo nga dili na siya pabalikon sa serbisyo aron makuhaan na ang mga alimatok sa mga buhatan sa gobiyerno.

Bisan tuod og pasangil pa lamang ang gibato nga pagpangilkil batok kang Castro apan dili ikalimod nga nasakpan siya sa akto ug nakuha diha mismo sa iyang mga kamot ang kabahin sa salapi nga gibayad sa aplikante ngadto kaniya atol sa gipahigayon nga entrapment operation sa mga sakop sa NBI.

Bisan unsaon pa pagbali-bali og limod ni Castro nga wala siya mangilkil  sa aplikante dili g'yud matuis ang kamatuoran nga nagkita silang duha sa aplikante ug nakuha ang salapi gikan sa iyang mga kamot.