"Engkwentro 14" sa ARQ Robles, Abne korona sa WBA ang gisaytan
CEBU, Philippines — Ang duha ka way pildeng mga batos sa ARQ Stable nga sila si Berland "The Triggerman" Robles ug Ian Paul "The Assassin" Abne naglaraw nga mosakmit og regional titles sa World Boxing Association (WBA) sa co-main event sa “Engkwentro 14” fight card sa ARQ Boxing Promotions karong adlawa (Sabado, Diseiembre 14) didto sa Bulacao Sports and Activity Center sa Talisay City.
Ang 24-anyos nga si Robles (10-0, 4KOs) makigsinukliay og kumo ni Chenghao Luo (7-1-1, 4KOs) alang sa bakanting trono sa WBA South flyweight division, samtang si Abne (11-0-1, 4 KOs), ang Philippine minumweight champion, makigharong batok sa laing Tsinoy nga bisitang si Jin Ping Yang (5-4-1, 1KO) alang sa bakanting WBA South 105-pound belt. Sa supporting bouts, ang ubang mga pambato sa ARQ nga sila si Rodel "The Hulk" Wenceslao, April Jay "Astroboy" Abne, ug Angelus Pilapil mopakita og aksiyon batok sa managlahing mga kontra.
Si Wenceslao (21-19-2, 10KOs), ang kasamtangang World Boxing Federation (WBF) Australasian welterweight champion, mosakbang ni Ryan Sermona sa Negros Occidental.
Si April Abne (14-1, 6KOs), ang Oriental and Pacific Boxing Federation (OPBF) Silver flyweight champion, makigsangka ni Anferne Palarca sa Bohol, samtang si Pilapil (3-0, 2KOs) makigbibukbukay ni Mohaleden Kalibo sa North Cotabato.
- Latest
