Celtics mitunol unang pilde sa Cavs

CEBU, Philippines — Si Jayson Tatum mipatuasik og 33 puntos sa dihang gipatilaw sa defending champion Boston Celtics ang Cleveland Cavaliers sa una niining pilde, 120-117, sa NBA kagahapon didto sa TD Garden sa Boston, Massachusetts.

Gawas sa eksplosibo niyang opensa diin siya milansang og unom ka 3-pointerss, si Tatum milangkat sab og 12 ka rebounds ug mipasa og pito ka assists.

Sa kinatibuk-an, ang Celtics mibomba og 22 ka tres aron putlon ang 15 ka sagunson nga daog sa Cavs.

Si Donovan Mitchell mipabuto og 35 puntos samtang si Evan Mobley midugang og 22 puntos, 11 ka rebounds ug 11 ka assists apan wala mosaler ang maanindot nilang salida ning higayona kay ang Cavs nahagba sa unang higayon ning season.

Sa laing aksiyon, si Russell Westbrook nahimong labing unang player sa kasaysayan sa NBA nga nakarehistro og 200 ka triple-doubles human siya mipupo oh 12 puntos, 10 ka rebounds ug 14 ka assists sa dihang gipayaka sa Denver Nuggets ang Memphis Grizzlies, 122-110.

Didto sa Dallas, si Luka Doncic mikadlit og 26 puntos aron pangulohan ang Mavericks ngadto sa 132-91 nga paglampornas sa New Orleans Pelicans.

Samtang ang San Antonio Spurs mipayaka sa Oklahoma City Thunder, 110-104, bisan og wala ang alas nilang Victor Wembanyama.

Wala sab magpabitin ang Los Angeles Lakers nga miinat sa sagunson nilang daog ngadto sa unom ka duwa human gipakaging ang Utah Jazz, 124-118.

Ang rookie nga si Dalton Knecht maoy bida sa Lakers human naka-igo og 12 sa 16 niya ka rita dayon na ngadto sa pagposte og 37 puntos.

Mihimo sab hinoon og kasikas sila si LeBron James ug Anthony Davis nga mitali og 26 puntos matag usa. — ( Banat News )