Gitgitan sa kalye nauwi sa barilan, paluan ng tubo: 1 dedo!
MANILA, Philippines — Patay ang isang obrero nang resbakan at pagbabarilin ng kapatid ng isang lalaking una niyang nakagitgitan sa kalye at nakapaluan pa ng tubo sa Rodriguez, Rizal kamakalawa.
Naisugod pa sa Casimiro Hospital ang biktimang si Rolino Garcia, 54, at residente ng Daang Bakal Manggahan, sa Rodriguez, ngunit idineklara na ring patay ng mga doktor, bunsod ng mga tama ng bala sa katawan habang nasugatan ang kanyang anak-anakan na si Elmo Alcober, 25, nang tiradurin ng mga suspek.
Nakatakas naman ang mga suspek na sina alyas “Ruben”, 40, construction worker, at alyas “Ryan”, 32, e-bike rider; kapwa residente ng Purok 5, Brgy. Manggahan, Rodriguez, Rizal.
Batay sa ulat ng Rodriguez Municipal Police Station, alas-7:30 ng umaga nang maganap ang krimen sa Daang Bakal, Brgy. Manggahan ng nasabing bayan.
Nauna rito, nagkaroon umano ng paluan ng tubo at dos-por-dos sa pagitan nina Garcia at ng isang alyas “Benjie” na kapatid ni Ruben matapos silang magkagitgitan sa kalye.
Sakay umano si Garcia ng isang bisikleta nang magalit siya matapos na ma-cut sa pagliko ni Benjie na nagmamaneho naman ng isang e-trike.
Nagsumbong umano si Benjie sa kanyang mga kaanak kaya’t kinumpronta ng mga ito ang biktima, na muling nauwi sa gulo. Dito na umano nagtungo sa barangay ang biktima at naghain ng reklamo. Gayunman, pagdating umano niya ng bahay ay inabangan na siya ng mga suspek at pinagtulungan si Alcober habang umaawat naman ang kanyang asawa.
Nahuli pa sa CCTV, kung paano malapitang tiradurin ni Ryan si Alcober.
Dahil dito, nagalit si Garcia at kumuha ng tubo at hinabol ang mga suspek.
Dito na, naglabas ng baril si Ruben at kaagad na pinaputukan ang sumusugod na biktima na napuruhan ng bala. Kahit sugatan, nagawa pa rin niyang mahambalos ang suspek, na nang makabawi ay kaagad nang tumakas.
- Latest
