Lady Knights tusok sa Lady Chiefs
MANILA, Philippines — Nagkapit-bisig sina Laika Tudlasan at Samantha Gabrielle Tiratira upang akayin ang Arellano University at mantsahan ang malinis na karta ng Letran, 25-20, 22-25, 25-23, 25-20, sa NCAA Season 100 women’s volleyball tournament kahapon sa Jose Rizal University Gym sa Mandaluyong City.
Bumanat si Tudlasan ng 19 points mula sa 18 kills at isang service ace para sa Lady Chiefs na inirehistro ang 3-3 karta at ipin0alasap sa Lady Knights ang unang talo sa anim na laro.
Mabangis na sinimulan ng Arellano ang laro nang ikahon ang 25-20 panalo sa first set, pero agad bumangon ang Letran upang itabla ang iskor sa 1-1 papasok ng third frame.
May tsansa sanang manalo ang Lady Chiefs sa second frame matapos nilang makalamang ng tatlong puntos, 20-17, pero hindi nila nakayanan ang tikas ng Lady Knights.
Hindi naman nagpabaya ang Arellano nang muling ilabas ang kanilang lakas para saklutin ang panalo sa sumunod na dalawang sets at tapusin ang laban sa apat na sets.
Inilista ni Tiratira ang 16 points, habang bumakas sina Heart Villaflores at Fhaye Mangubat ng tig-siyam at walong marka, ayon sa pagkakasunod.
Sunod na makakalaban ng Arellano ang Jose Rizal University sa Marso 28 sa EAC Gym.
Nanguna sa opensa ng Lady Knights si Marie Judiel Nitura sa itinalang 23 markers.
- Latest
