PORTLAND, Ore. — Nagpasabog si Shai Gilgeous-Alexander ng 33 points para banderahan ang NBA-leading Oklahoma City Thunder sa 118-108 panalo sa Trail Blazers.
Ito ang pang-15 sunod na pagdaig ng Oklahoma City (37-8) sa Portland (17-29) sa kanilang duwelo.
Nag-ambag si forward Jalen Williams ng 24 points at 8 assists, habang humakot si center Isaiah Hartenstein ng 14 points at 11 rebounds para sa Thunder na nakabawi sa naunang kabiguan sa Dallas Mavericks.
“Just executing,” wika ni Hartenstein. “Focusing on the details.”
Pinamunuan ni Deni Avdija ang Trail Blazers sa kanyang 28 points, 8 assists at 7 rebounds.
Nagtapos ang kanilang four-game winning streak.
Nagdagdag si Scoot Henderson ng 25 points mula sa bench kasunod ang 24 markers ni Toumani Camara
Nakalapit ang Portland sa 88-93 mula sa dalawang free throws ni Anfernee Simons sa huling 2:37 minuto ng fourth quarter matapos mabaon sa isang 15-point deficit sa third period.
Kumonekta si Williams ng isang three-pointer para muling ilayo ang Thunder sa 96-88.
Ang isa pang triple ni Alex Caruso ang nagpadyak sa 105-90 bentahe ng Oklahoma City.
Itinala ng Thunder ang 112-106 kalamangan sa huling 1:49 remaining matapos ang slam dunk ni Hartenstein mula sa assist ni Gilgeous-Alexander.
Sunod na isinalpak ni Gilgeous-Alexander ang isang driving layup para hatakin ang kanilang bentahe sa double digits.
Mula rito ay hiindi na nakalapit ang Portland.
Nauna nang kinuha ng Trail Blazers ang 10-point lead bago nakatabla ang Thunder sa 27-27 patungo sa pagtatayo ng 66-53 halftime advantage.