Numero unong luna ang tirada Cheetahs mipahayag sa ilang kampanya

CEBU, Philippines — Ang Benedicto College (BC) Cheetahs mipahayag sa ilang kampanya nga angkonon ang numero unong luna ug twice-to-beat advantage sa Final Four samtang ang University of San Carlos (USC) Warriors nanamilit nga madaogon sa Cebu Schools Athletic Foundation, Inc. (CESAFI) Season 24 men's basketball tournament niadtong Sabado, Nobiembre 23, didto sa Cebu Coliseum.

Sila si Denrick Orgong ug Junil Bulan parehong mikadlit og double-double sa dihang giangklahan sa Cheetahs ang opensa sa Cebu Institute of Technology-University sa pinal nga singko minutos dayon na ngadto sa pagposte og 76-59 nga demolisyon sa Wildcats. Si Orgong mibulsa og 16 puntos ug 14 ka rebounds samtang si Bulan midugang og 14 puntos ug 13 ka rebounds nga iyang gisukipan og duha ka assists.

Si Kenneth Babalcon mitampo og 12 puntos, lima ka rebounds, tulo ka assists ug upat ka steals alang sa Cheetahs, nga miinat sa ilang baraha ngadto sa 6-1 ug puyde pang malabni ang No.1 seed kon ugaling ilang mapilde ang  7-0 nga University of Cebu (UC) Webmasters sa katapusang adlaw sa eliminasyon karong Martes, Nobiembre 26.

Ang Cheetahs naglabaw lang unta og singko puntos,62-57, sa tunga-tungang bahin sa katapusang kuwarter apan gitak-op ang duwa pinaagi sa 14-2 nga bomba aron ilubong ang Wildcats og 17 puntos.

Sa laing bahin, si Kyle Maglinte mipabuhagay og 27 puntos, siyam ka rebounds, duha ka assists ug duha ka steals samtang si Bryle Puntual mipupo og 20 puntos, duha ka rebounds ug duha ka assists sa dihang ang USC Warriors miwani sa Cebu Roosevelt Memorial Colleges (CRMC) Mustangs, 94-88, aron pagbabay sa liga uban ang 2-6 rekord.

Sa juniors division, ang two-time defending champion Sacred Heart School-Ateneo de Cebu (SHS-AdC) Magis Eagles ug University of the Visayas (UV) Baby Lancers mirehistro og makapadasig nga daog padung sa semifinals.

Si Jelomar Rota miharos og 21 puntos ug 19 ka rebounds sa dihang gitumba sa Magis Eagles ang University of Southern Philippines Foundation (USPF) Panthers, 58-52, samtang ang Baby Lancers nagsandig sa balanseng ataki diin pito nila ka players ang milansang og double figures sa 112-65 nilang pagkastigo sa CRMC Baby Mustangs.

Ang Magis Eagles mihuman sa eliminasyon isip No.2 qualifier uban ang 10-1 nga marka nga naghatag kanila og twice-to-beat nga bentaha batok Baby Lancers sa giatngan nilang engkwentro sa semis karong Huybes, Nobiembre 28.