USC, DBTC padayong nanginit sa CESAFI football

CEBU, Philippines — Ang mga defending champion nga University of San Carlos (USC) Golden Booters ug Don Bosco Technical College (DBTC) Greywolves nagpabiling way pilde sa Cebu Schools Athletic Foundation, Inc. (CESAFI) Season 24 men's football tournament didto sa Cebu City Sports Center niadtong weekend.

Sa college division, ang Golden Booters nakaipsot sa University of San Jose-Recoletos (USJ-R) Kicking Jaguars, 2-1, aron palapdan ang perpektong sinugdanan ngadto sa 4-0.

Si MC Maiko Silva sa USJ-R maoy unang naka-iskor sa ika-13 nga minuto apan ang USC nakatabla kortesiya sa goal ni John Cyril Sinoy sa ika-46 nga minuto. Si Christian Vierh Agot maoy midaog sa mga Carolinians human mipansak og goal sa ika-59 nga minuto.

Sa laing duwa, ang University of the Philippines (UP) Cebu Fighting Maroons nakalingkawas sa University of Southern Philippines Foundation (USPF) Kicking Panthers, 2-1, aron inaton ang ilang baraha ngadto sa 3-1. Ang  USPF misusprisa sa UP Cebu sa dihang si Roberto Luis Aguilar milansang sa buena manong goal sa nakaon nga upat ka minutos pa lamang sa duwa.

Apan ang Fighting Maroons madasigon nga miresbak pinaagi sa duha ka sagunson nga goals nilang Carl Marx Carin ug Jaybe Abasolo sa ika-40 ug ika-45 nga minuto aron tumbahon ang Kicking Panthers. Sa secondary category, ang DBTC Greywolves mipiog sa Sacred Heart School-Ateneo de Cebu (SHS-AdC) Magis Eagles, 2-1, alang sa ikatulo nilang daog uban ang usa ka tabla.

Sila si John Lexter Conde ug Allister Louis Manlosa mituboy sa Bosconians ngadto sa 2-0 nga labaw human sila naka-iskor sa ika-40 ug ika-79 nga minuto. Si Adam Clinton Lee sa Ateneo de Cebu naka-goal sa ika-80 nga minuto apan ulahi na ang tanan.

Sa laing sangka, si Cyrus Primar Ventura mikulit og goal sa ika-18 nga minuto sa dihang ang USJ-R mitabla sa ilang rekord ngadto sa 2-2 uban ang 1-0 nga kadaogan batok sa USC.