MANILA, Philippines — Sasandalan ng University of the Philippines sina Francis Lopez at Quentin Millora-Brown pagharap nila sa naghihingalong National University sa UAAP Season 87 collegiate men’s basketball tournament na lalaruin sa UST Quadricentennial Pavilion ngayong araw.
Nagsisimula ang labanan ng UP at NU sa alas-3:30 ng hapon pagkatapos ng bakbakan sa pagitan ng University of the East at Far Eastern University sa alas-12 ng tanghali.
Napahaba ng last year’s runner-up UP ang kanilang winning streak sa tatlo matapos silang akbayan sa opensa nina Lopez na kumana ng 20 points, limang rebounds at tig-isang steal at block at Millora-Brown na nirehistro ang 11 markers, 10 boards at isang block.
Tangan ng UP ang 9-1 card, solo nila ang second spot sa team standings habang nasa tuktok ang defending champion De La Salle University na may 10-1 karta.
Nasa pangatlo ang UE tangan ang 6-4 baraha habang pang-apat ang University of Sto. Tomas na may 5-6 card.
Impresibo ang panalo ng UP sa kanilang huling laro kung saan ay tinambakan nila ang tropa ni head coach Tab Baldwin na Ateneo de Manila University, 75-47.
Pero kahit nadomina ng Fighting Maroons ang Blue Eagles ay malaki ang respeto ni UP mentor Goldwin Monteverde kay Baldwin.
Maliban kina Lopez at Millora-Brown, huhugot din ng puwersa ang Fighting Maroons kina Jacob Bayla at Reyland Torres.