La Salle, FEU kakalsuhan ang semis berth sa SSL volley

MANILA, Philippines — Pakay ng unbeaten teams De La Salle University at Far Eastern University ang semifinals tickets kontra sa magkahiwalay na katunggali sa magaganap na 2024 Shakey’s Super League Collegiate Pre-season Championship quarterfinals na lalaruin sa Rizal Memorial Coliseum.

Tangan ang twice-to-beat advantages matapos manguna sa kanilang pools sa second round, makakaharap ng La Salle ang Ateneo de Manila University sa ala-1 ng hapon habang katapat ng FEU ang College of Saint Benilde sa alas-11 ng umaga.

Tanging ang La Salle at FEU ang wala pang dungis simula sa unang round ng group stage, pinagwagian nila ang lahat ng anim na nakalaban sa event na katuwang Smart Sports, PLDT Fibr, Mikasa, Asics, Rebel Sports, Eurotel, Victory Liner, Commission on Higher Education (CHED), Philippine Sports Commission (PSC), at SM Tickets bilang technical partners.

Tulad ng DLSU, tangka rin ng Lady Tamaraws na mapalapit sa asam na korona laban sa Lady Blazers na walang naipanalo sa tatlong laro sa second round. 

Samantala, makakatapat ng defending champion National University ang University of the Philippines sa alas-4 ng hapon sunod ang bakbakan ng University of Santo Tomas at University of the East sa alas-6 ng gabi sa tournament na suportado ng Shakey’s Pizza Parlor, GCash, Chery Tiggo, F2 Logistics, Peri-Peri Charcoal Chicken, Potato Corner, R and B Milk Tea at Summit Water.

Tiyak na hindi magku-kumpiyansa ang three-peat-seeking NU laban sa UP.