TNT-GSM Finale suportado nina Chua, Vargas
MANILA, Philippines — Ang dalawang pinakamahusay na head coaches at imports sa PBA ang magtutuos sa Season 49 Governors’ Cup best-of-seven championship series.
Kaya naman walang itulak-kabigin sina PBA Board chairman Ricky Vargas ng nagdedepensang TNT Tropang Giga at vice chairman Alfrancis Chua ng Barangay Ginebra.
“It’s the defending champion (TNT) versus the darling of the crowd (Ginebra). It’s also a conference where Ginebra and TNT will finally meet once again after a long period of time in the finals so this is going to be an exciting finals,” ani Vargas.
Nakatakda ang Game One bukas sa Ynares Center sa Antipolo City kung saan ang mga mabebentang tiket ay ibibigay ng PBA sa mga biktima ng bagyong ‘Kristine’.
Magtutuos sa PBA Finals sina Ginebra coach Tim Cone at TNT mentor Chot Reyes sa unang pagkakataon matapos ang 12 taon.
Nasa kanilang ika-31 finals appearance, puntirya ng Ginebra ang pang-16 korona, habang target ng TNT ang ika-11 titulo sa pang-23 finals stint nila.
“It’s about two great coaches, maglalaban, magbabasahan ng depensa, adjustments, everything,” sabi ni Chua sa 66-anyos na si Cone at sa 61-anyos na si Reyes.
“They know each other. Iyon ang maganda diyan. They know their style so magandang palaisipan. Parehong may national players...Sa Sunday matutuwa sigiurado si chairman - maglalaro sila na maraming fans kasi Ginebra kalaban eh,” dagdag nito.
Pinatalsik ng TNT ang Rain or Shine, 4-1, habang sinibak ng Ginebra ang San Miguel, 4-2, sa kani-kanilang semifinals series.
Bukod kina Cone at Reyes ay magtutuos din sina imports Justin Brownlee ng Gin Kings at Rondae Hollis-Jefferson ng Tropang Giga.
- Latest
