MANILA, Philippines — Kinapitan ng Ateneo de Manila University ang kanilang rookies na sina Kristian Porter at Jared Bahay sa opensa para kaldagin ang National University sa makapigil hiningang 70-68 panalo sa UAAP Season 87 collegiate men’s basketball tournament na nilaro sa Smart Araneta Coliseum kahapon.
Nagtala si Porter ng double-double performance na 14 points at 10 rebounds kasama ang tig-dalawang steals at blocks para tulungan ang Blue Eagles na ilista ang pangalawang panalo sa walong laban.
Nakabawi si Porter mula sa masagwang laro nang una nilang makaharap ang Bulldogs sa first round kung saan ay bokya ito sa puntos at isang rebound lang ang nai-ambag nito.
“My mindset coming to the game was just do my job and help the team no matter how and just play through the system, the points just came, the rebounds. I just trusted my teammates and I wanna put this out here, the Ateneo community. Going out, seeing the whole community no matter our standing, they’re still there for us,” ani Porter.
Kumana si Bahay ng 12 puntos, anim na boards, limang assists, at isang steal habang 10 points at walong rebounds ang inambag ni Chris Koon para sa Ateneo na nakalsuhan ang kanilang three-game skid.
Naging matatag ang Blue Eagles at lumaban ng sabayan kahit wala ang kanilang’ frontcourt players na sina Kyle Ong at Josh Lazaro.
Tumikada si Jake Figueroa ng 15 points at 10 rebounds habang kinana ni Jolo Manansala ang 12 markers at pitong rebounds para sa Bulldogs.