TNT nakauna sa NLEX

MANILA, Philippines — Ipinakita ng TNT Tropang Giga kung bakit sila ang No. 1 team sa Group A.

Bumangon ang Tro­­pang Giga mula sa 13-point deficit sa third period para resbakan ang NLEX Road Warriors, 107-102, sa Game One ng PBA Season 49 Governors’ Cup quarterfinals series kahapon sa Ninoy Aquino Stadium sa Malate, Manila.

Bumanat si import Rondae Hollis-Jefferson ng 34 sa kanyang 45 points sa second half para sa 1-0 lead ng TNT sa kanilang best-of-five quarterfinal duel ng NLEX.

“We just had to buckle down and tighten the defense and made some adjustments, and in the end I think the work paid off,” sabi ni coach Chot Reyes.

Kinuha ng Road Warriors, nakahugot kay import DeQuan Jones ng 38 points, ang 56-43 kalama­ngan sa kaagahan ng third quarter.

Unti-unting nakalapit ang Tropang Giga sa likod nina Hollis-Jefferson at Roger Pogoy para agawin ang 73-71 abante sa third period.

Huling nakalapit ang Road Warriors sa 91-93 mula sa jumper ni Richie Rogers sa 2:39 minuto ng final canto kasunod ang arangkada nina Hollis-Jefferson at Calvin Oftana para sa 100-91 abante ng Tropang Giga sa 1:31 minuto nito.

Samantala, muling mag­tutuos ang Barangay Ginebra at karibal na Meralco sa Game One ng kanilang quarterfinals showdown ngayong alas-5 ng hapon.

Tinalo ni import Justin Brownlee at ng Gin Kings si reinforcement Allen Durham at ang Bolts sa PBA Finals noong 2016, 2017 at 2019 ng Governors’ Cup at sa 2020 Philippine Cup.

Sa alas-7:30 ng gabi ay magsasalpukan ang San Miguel at Converge sa sarili nilang duwelo.

Ipaparada ng Beermen si import EJ Anosike kapalit ni injured Jordan Adams sa kanilang pagsagupa sa FiberXers.