MANILA, Philippines — Igagawad sa buong coaching staff ng Meralco Bolts ang Baby Dalupan Coach of the Year award sa 30th PBA Press Corps Awards Night ngayong gabi sa Novotel Manila Araneta City.
Ito ay dahil sa pagkopo ng Bolts sa kauna-unahan nilang PBA championship matapos talunin ang San Miguel sa nakaraang Philippine Cup Finals.
Ang Meralco coaching staff ay pinamumunuan ni head coach Luigi Trillo katuwang sina active consultant Nenad Vucinic at deputies Gene Afable, Reynel Hugnatan at Sandro Soriano kasama si consultant Norman Black.
Nauna nang nakamit ni Trillo ang nasabing karangalan na ipinangalan sa tinaguriang ‘Maestro’ ng Philippine basketball na si Virgilio ‘Baby’ Dalupan noong 2012-13 season nang igiya niya ang Alaska franchise sa kanilang huling PBA title sa Commissioner’s Cup.
Si dating PBA Commissioner at Samahang Basketbol ng Pilipinas (SBP) Executive Director Renauld ‘Sonny’ Barrios ang special guest of honor at keynote speaker sa pagsama niya sa Press Corps na pinamumunuan ni president Vladi Eduarte ng Abante.