Altas itinumba ang Generals
MANILA, Philippines — Pinigilan ng University of Perpetual Help System DALTA ang pagbulusok matapos talunin ang Emilio Aguinaldo College, 73-67, sa NCAA Season 100 men’s basketball kahapon sa FilOil EcoOil Centre sa San Juan City.
Naglista si rookie guard Mark Gojo Cruz ng 18 points, 6 assists, 5 rebounds, 3 blocks at 2 steals para tapusin ang two-game losing skid ng Altas at iposte ang 3-2 kartada.
Laglag naman ang Generals sa 2-3.
“iyong effort defensively was definitely there. It was total team effort talaga. Pati bench namin, quality minutes ang ibinigay nila,” ani coach Olsen Racela.
Nagdagdag si Christian Pagaran ng 15 markers para sa Perpetual na kinuha ang 70-54 bentahe sa huling 2:18 minuto ng fourth quarter.
Ito ay matapos na ring makadikit ang EAC sa 47-51 agwat matapos maiwanan sa third period, 42-49.
Pinamunuan ni King Gurtiza ang Generals sa kanyang 17 points.
Nag-ambag si Nico Quinal ng 16 markers kasunod ang 15 points ni Wilmar Oftana.
Sa ikalawang laro, pinatumba ng nagdedepensang San Beda University ang Jose Rizal University, 77-60.
Humakot si big man Yukien Andrada ng 16 points, 10 rebounds at 3 assists para sa 3-2 baraha.
Nabaon ang Heavy Bombers sa 1-4.
Mula sa dikitang first period ay umarangkada ang San Beda sa second quarter para itarak ang 46-22 halftime lead kontra sa Jose Rizal.
Mula rito ay hindi na nilingon ng Red Lions ang Heavy Bombers para makabangon sa naunang kabiguan.
- Latest