Santor 2 ginto ang pinalubog sa PAI-Speedo Swim Series

MANILA, Phillippines — Dalawang gintong medalya ang nilangoy ni Patricia Santor ng Ilustre East Aquatics Club sa paghataw ng ‘Go Full Speedo’ Swim Series Long Course Swimming Meet Leg 1 kahapon sa Teofilo Yldefonso swimming pool sa Rizal Memorial Sports Complex (RMSC) sa Malate, Manila.

Bumandera ang 16-anyos na Senior High ng University of Santo Tomas sa girls’ 16-yrs 200-meter breaststroke at 100m freestyle sa mga oras na 2:50.68 at 1:02.80, ayon sa pagkakasunod, sa Philippine Aquatics, Inc. (PAI) sanctioned meet na nilahukan ng kabuuang 480 entries mula sa 38 swimming clubs.

“Nasa kondisyon po. Binigyan po ako ng dagdag na load sa training ni coach Ramil (Ilustre) at medyo hindi naging maganda ‘yung performance ko last National Trials, kaya bumawi kami ngayon,” sabi ng miyembro ng Philippine Team na sumabak sa Asian Age Group Championships noong Pebrero sa New Clark City.

Tinalo ni Santor sina Kassandra Macaraig ng South Warriors (2:27.44) at Alessandra Doniego ng Golden Sea Eagles (3:33.76) sa 200m breast stroke.

Sinapawan naman niya sina Savinnah Oliveros ng Flying Lampasot (1:05.43) at Nichole Rivera ng Golden Sea Eagles (1:05.43) sa 100m freestyle.

Hataw din sina Las Pinas pride Nicola Queen Diamante at South Cotabato phenom Jie Angela Mikaela Talosig na nagwagi sa kani-kanilang age group classes sa torneo na bahagi ng PAI National ranking system katuwang ang Speedo, Philippine Sports Commission (PSC) at Philippine Olympic Committee (POC).

Bumida si Diamante, Grade 9 student ng Augustinian Abbey at miyembro ng RSS Dolphins club, sa girls’ 13 yrs.-old 100m freestyle sa oras na 1:07.48 kontra kina Shannen Baldereas ng QC Waves (1:07.72) at Sandy Martin ng Village Sports (1:07.78).

Wagi naman si Talosig ng Midsayap Pirates sa girls’18 yrs-old 100m freestyle (1:01.80) laban kina San Beda teammates Alyssa Pablo (1:03.80) at Cheera Duran (1:03.87).

Kumana rin ng gold sina Loure Santiago ng Flying Lampasot sa boys’ 7 yrs old 100 freestyle (1:29.88); Damian Cupcupin (8-yrs old, 1:32.15); Mikhael Mojdeh (9-yrs old, 1:17.21); Christian Uy (10-yrs, 1:11.73); Alli Delos Reyes ng Santa Rosa Swim Club sa girls 6-yrs old 100m free (2:41.12); Sophia Clara Quingco (8-yrs, 1:47.31); Alessandra Hequibal (9-yrs, 1:12.47); Jemimah Reyanna Dumpit (10-yrs, 1:15.89); Findlay Mackenzie ng Elizabeth Seton sa boys 11-yrs-old 100m free (1:04.36); Titus Sia (12-yrs, 1:03.84); Vynz Tadulan (13-yrs, 1:00.78); Aishel Evangelista (14-yrs, 57.64); Matt Aaron Nerison (15-yrs, 57.28); Shiblon Montera (16-yrs, 58.02); Albert Jose Amaro (17-yrs, 53.10); Nimrod Montera (18-yrs, 55.44); Josh Baquiano (19-yrs, 53.50); Ceanna Mitra ng Rapid Dolphins sa girls 11-yrs old 100m free (1:09.68); Sophia Garra (12-yrs, 1:03.07); Krystal David (14-yrs, 1:04.62); Kristine Jane Uy (14-yrs, 1:04.12); Kriztel Napallatan (17-yrs, 1:04.56) at Janelle Chua (19-yrs, 1:01.35).